بدى كارينا

موضوع: بدى كارينا 7/1/2009, 10:50

اخواتى فى الله .... من يمكن سنتين او اكتر طلعت موضة كدا اسمها بديهات كارينا وسلفى وفيجا و......
بس الغريب ان المحجبة وغير المحجبة بيلبسوها وانا كنت واحدة منهم . الفكرة انها مش زى اى بدى او تيشريت بيتلبس
انتوا عارفين انها بتلتصق بالجسم بشكل غريب يعنى مش ممكن حتى اختك الصغيرة تشدك منه توسعهولك ( دا مبيوسعش)يعنى نقدر نسميه بدى رش .. الشىء اللى يحير بجد اننا ممكن نجيب تونيك او فستان سهرة مثلا مفتوح من الضهر او من قدام ونلبس تحتيه كارينا ونقنع نفسنا اننا كدا غطينا فتحة الفستان مع انك بجد لو ركزتى هتحسى ان هى هى خصوصا كمان لو الكارينا نفس لون الجسم. وممكن لو حد شافك من بعيد مش هياخد باله انك لابسة بدى اصلا
وبقالنا سنتين واكتر بنعتمد عليه فى كل لبسنا لدرجة ان البديهات اللى بكوم اختفت وكله دلوقتى نص كوم او كت تحته بدى كارينا
بس احنا لازم نقف شوية مع نفسنا ونفكر احنا كدا صح؟؟ هو ينفع اننا نلبس ومنلبسش فى نفس الوقت؟؟
احنا مسلمات يعنى لازم نظهر بمظهر الاسلام .. انا مش بقولك اقلعى الطرحة القصيرة والبسى طرحة طويلة او خمار كدا مرة واحدة لالالالالالا ابدا الفكرة كلها انك هتخدى خطوة ايجابية وهتعملى الصح فى حق دينك وفى حق نفسك
وبلاش نبقى من الكاسيات العاريات اللى ربنا لعنهم فى الدنيا والاخرة

طيب تعالو نفكر فيها من زاوية تانية.. احنا مش بنلبس كارينا تحت بدى نص او كت؟؟
طيب ما تيجى نلبس البدى الكت او النص دا تحت جاكيت شتوى او صيفى على حسب الجو.. متهيالى دا يبقى حل كويس لحد ما نغير طريقة لبسنا للاحسن.. والله انا جربتها بجد اللبس كان شكله اشيك كتير..وبديهات كارينا اللى عندك دى انتى مش هترميها ولا حاجة انتى هتلبسيها ف الشتا مثلا او تستخدميها بقى اى استخدام تانى وفى الاول والاخر مش هتخسرى حاجة بالعكس انتى هتحمى نفسك من نظرات مبترحمش وفتنة فى الرايحة والجاية وهتدى انطباع احسن عن دينك وعن نفسك.. انا عارفة ان اغلب لبس البنات دلوقتى بيعتمد على كارينا دا وانا كمان كنت كدا بس اللى عاوز حاجة بيعملها حتى لو عندك جاكيت واحد البسيه فوق لبسك ومعلش استحملى لحد ما تجيبى لبس غير اللى عندك يكون مثلا تونيك بكوم او على الاقل تلتين كوم اهه على كل حال هيبقى احسن من بديهات الرش اللى بتتلبس
وطالما احنا مسلمين يبقى نلبس لبس المسلمين وكفاية بجد اللى فاتنا ونفكر شوية فى دينا وربنا ومش بدى كارينة هو اللى هيقف فى طريق رضا ربنا علينا .. المسلم ارادته اعلى من كدا بكتير .. ولو مش خايفة على دينك يبقى خافى على نفسك من اللى بيحصل للبنات كل يوم بسبب اللبس اللى بيلبسوه ولو مش خايفة على نفسك يبقى خافى على ولى امرك اللى هيتحاسب عليكى سواء كان والدك او اخوكى او زوجك ومش معنى انه اداكى حريتك فى اختيار لبسك يبقى دا يكون جزاؤة ولو انى مقتنعة انه ولى الامر لو ساب بنته كدا يبقى مشترك معاها فى الذنب
والله جربى بجد مش هتخسرى حاجة وانوى نية صافية لله وحده انك هتتبعى اوامره وهتبيعى الدنيا كلها وتشترى رضاه وشوفى ربنا هيكافئك بأيه
وافتكرى دايما ان الطيبون للطيبات والخبيثون للخبيثات
وربنا يهدينا لما يحبه ويرضاه

اسال الله تعالى ان يهدى نساء المسلمين وان يلبسهن لباس التقوى انه ولى ذلك ومولاه

امــــــــــــــــين

موضوع: رد: بدى كارينا 7/2/2009, 22:10

جزاكى الله خيرا يا روز واللهى كلامك كله صح حتى نشم رائحة الجنة.
ولا نكون ممن قال عنهم صلى الله عليه وسلم : كاسيات عاريات مائلات مميلات رؤوسهن كأسنمة البخت لا يدخلن الجنة و لا يجدن ريحها .
أعاذنا الله و اياكى ان نكون منهن

موضوع: رد: بدى كارينا 7/3/2009, 04:11

جزانا واياكى يا ام يوسف

شكرا لمرورك نورتينى