حكايتى مع الحب حكاية غريبة
حكاية مليانة مواقف عجيبة
كان نفسى زمان أحب و أعشق
و آخد لى مكان وسط الحبيبة
لكن كان شئ بيوقفنى
و قلبى يقولى يا شيخ بلا خيبة
*****
سألت قلبى ممكن تحب ؟
قالى ده و الله فى علم الغيب
و كنت بخاف مع كل يوم
يعدى و شمسه عليا تغيب
لحد ما مرة الحظ ابتسم
و قلت خلاص حلاقى حبيب
أتارى حبيبى ده أكبر كدبة
و كل شئ قسمة و نصيب
*****
من يومها يا قلبى حالك تعبان
و خلاص مبقاش فيك أمل
لا فى فرح و لا فى أحزان
تقولش معمولك عمل
و أنا معاك ضعيف غلبان
و صابر عليك صبر الجمل
خايف لا مرة يجينى جنان
و يبقى باب الحياة اتقفل
*****
إصحى يا قلبى و فوق و إرفع
صوتك و افتح شباك و شيش
حالتك ديا مش راح تنفع
و انت ساعتها ما تهمنيش
كفاية عليا أنا لازم أرجع
لازم أكمل لازم أعيش
خايف أعيش طول عمرى لوحدى
و اللى فى بالى تروح متجيش
