الموضوع اللى عاوزة اتكلم فيه النهاردة كلكوا عارفينه والمنتدى الحمد لله مليان مواضيع عنه
وعن تفاصيل كتير فيه كتير منا مكنش يعرفها
من غير ما اطول عليكم
الموضوع عن الصلاة والفروض الخمسة اللى ربنا فرضها على كل مسلم
وزى ما قلت المنتدى ما شاء الله فيه الكتير من المواضيع اللى منزها الاعضاء عن الموضوع دا بتفاصيل كتير كانت غايبة عن كتير مننا
بس اللى عاوزة اقوله النهاردة مختلف شوية
كل اللى هقوله هو سؤال واحد جه على بالى وحبيت انى اساله هنا
وعموما انا مش مستنية من حد رد على موضوعى دا
انا كل اللى يهمنى بجد ان اللى يقرا السؤال دا يكون صريح مع نفسه وصادق معاها كل الصدق
وبينك وبين نفسك جاوب ومتقوليش اجابتك وشوف اذا كانت اجابتك مريحاك وضميرك مستريح ليها ولا لا
وبرضه كل دا هيكون جواك انت ومش هتقوله لحد
يا جماعة باختصار
السؤال هو..................
لما بيفوتك فرض من فروض الصلاة الخمسة فى اليوم
1-بتبقى تعبان ومضايق جدا وبتستغفر ربنا كتيروتتمنى ان الوقت يرجع بيك عشان تلحق الفرض دا؟
2-بتقول بينك وبين نفسك معلش بقا هبقى اصليه وقت تانى وخلاص؟
3-مش بتهتم اصلا؟
جاوب بقا مع نفسك بصدق وشوف اذا كان ضميرك مرتاح لاجابتك ولا لا
انت اكيد هتكون اصدق واحد مع نفسك
بس لو انت مستريحتش لاجابتك وحسيت انك مكسوف من نفسك
بلاش تعدى الموضوع وتنساه وتعمل نفسك مش واخد بالك
حاول تهتم فعلا بالموضوع وافتكر دايما ان طالما ضميرك مش مرتاح يبقى انت جواك بذرة خير
حاول ترويها جواك عشان تكبر كل يوم
ولو انت لاسمح الله مش مواظب على الصلاة ولقيت حد بيذكرك اعرف وخليك متاكد ان ربنا بيحبك وعاوزك من عباده الصالحين اللى هيدخلهم جناته وينعموا فيها بكل ما لا رات عين ولا خطر على قلب بشر
لان اللى ربنا بيحبه بيبعتله دايما حد يذكره بالخير ويبعده عن الشر
واعتبر دى فرصه ليك وانت على اعتاب الشهر الكريم
صح مفيش حاجة بتيجى مرة واحدة بس انا بقول حاول
ممكن فى الاول يكون الموضوع غريب بالنسبة لك
بس ان شاء الله بعد كدا انت اللى هتستنى الاذان علشان تقف بين ايدين ربنا
وتحس باعظم احساس فى الوجود
وافتكر دايما ان الصلاة عماد الدين وان من اقامها اقام الدين
وافتكر كمان ان اول ما يحاسب عليه الانسان هو الصلاة
وافتكر برضه ان دول خمس فروض بس
كانوا هيبقوا خمسين لولا رحمة ربنا بينا وطلب سيدنا محمد وحواره مع سيدنا موسى عليه السلام
وبرضه خليك فاكر انك بتقضى على النت فى اليوم مش اقل من ساعتين
فى نفس الوقت اللى فرض الصلاة مش بياخد منك اكتر من خمس دقايق
افتكر نعم ربنا عليك
وتخيل مثلا لو نعمة منهم اتشالت منك
شوف هتعمل ايه وهتتصرف ازاى
تخيل لو انت اعمى او اصم او ابكم او...او.....او......
افتكر ......وافتكر.......وافتكر........
يااااااااااااااااااااااه
شفت بقا
يالا خلاص مفيش وقت
اتحدى نفسك وانتصر عليها
وبلاش حوار هبدا اصلى من يوم السبت الجاى دا
عارفة انا الكلام دا
اعقد انت بس نيتك من دلوقتى
وحضر نفسك اليومين دول وواظب على الصلاة
واستقبل الشهر الكريم وانت تائب ومستغفر
وشعارك
(الا صلاتى)
اللهم لا تجعل صلاتنا عادة واجعلها عبادة
اللهم اغفر للمؤمنين والمؤمنات والمسلمين والمسلمات الاحياء منهم والاموات انك سميع قريب مجيب الدعوات يارب العالمين
