رايكم لو سمحتم

اولا احب اشكركم على القسم الجميل دا وانتوا منتدى حلو جدا وشدنى جدا
انا كنت بس عاوزة اخد رايكم فى حاجة
لو فيه واحدة طول عمرها بتحب واحد ومتعرفش اذا كان بيحبها ولا لاء والواحد دا اكبر منها بسنة وعدت عليها سنين الجامعة كلها على امل انه ييجى يكلمها وهو برده مش بييجى ومش حاسة منه اى حاجة ناحيتها
المهم هو اتخرج قبلها وهى فى سنة رابعة جالها عريس كويس جدا ومحترم وكدا المهم بعد تردد كبير وافقت عليه لانها مش ضامنة انها تكون فى بال اللى بتحبه اساسا وممكن يكون مشغول بحد تانى وساعتها هتكون خسرته وخسرت العريس المحترم اللى جالها .. المهم اتخطبت للعريس دا وبعدين عدت فترة واكتشفت بطريق غير مباشر واتاكدت ان الشخص دا كان بيحبها طول السنين اللى فاتت ويتجنب التعامل معاها عشان ميسببلهاش ولا يسبب لنفسه احراج (لانه من النوع اللى بينكسف) وكان مستنى يتخرج ويشتغل عشان يتقدملها وفوجىء انها اتخطبت لحد تانى
السؤال بقى... هل البنت تسيب خطيبها المحترم اللى مشفتش منه اى حاجة وحشة وتفسخ الخطوبة عشان تتخطب للتانى
ولو عملت كدا فعلا هل ممكن تنزل من نظر حبيبها لانها سابت حد عشانه ويفكر انها ممكن تسيبه عشان حد وبرضه فى نفس الوقت ذنبه ايه خطيبها وهو معملهاش اى حاجة وحشة عشان تسيبه كدا من غير سبب .. وهى اتعاملت معاه وعرفته فى الوقت نفسه اللى متعاملتش فيه مع اللى بتحبه المعامله اللى تخليها تعرفه كفاية وخايفة انه ميكونش زى الصورة اللى رسمتهاله طول عمرها بس برضه هى من جواها لسة بتحبه وفى نفس الوقت بتعز خطيبها يعنى مش بتكرهه بس برضه مش بتحبه وفى شكوك فى دماغها ان خطيبها ممكن يتقلب بعد الجواز
يعنى بصوا من الاخر الموضوع متعقد من نواحى كتير اوى اوى قولولى بقى رايكم

حدوتة ازيك يارب تكونى بخير
بصراحة انا مش مع وجع الرحيل
مفيش اى ظروف فالدنيا تخلية مش يقول او حتى يلمح بحبة ليكى
على لاقل كنت عرفتى حتى لو اتقدملك حد كنت هتعرفى تعملى اية
تانى حاجة انتى بيقولى ان خطيبك محترم وكويس وانك اتعملتى معاة وعرفتية يبئى مالوش ذنب فكل اللى بيحصل دا وبجد هيكون حرام انك تسيبة علشان بس مجرد انك عرفتى ان اللى كنت بتحبية بيحبك بصراحة مش منطق
فكرى كويس اوى علشان متندميش
صلى استخارة وان شاء الله ربنا هيوفقك للخير ليكى
وحطى حاجة قدامك كما تدين تدان ولو بعد حين
لو هتسيبى خطيبك علشان انتى مش حسة انك بتحبية اوعلشان ظروف عادى جدا
بس علشان خاطر اى حد تانى لااااااااازم تفكرى وتحكمى عقلك اوى اكتر من قلبك
ربنا يوفقك يارب ياحدوتة
واسفة للاطالة

اهلا بيكى يا حدوتة معانا
و يارب يوفقك للخير
انا مع توتة فى كل اللى قالته
و بقولك ازاى اللى مجلوش جرأة يقولك انه بيحبك
قبل ماتتخطبى يقدر يقولك وانتى مخطوبة لواحد تانى
الرسول (ص) نهى عن خطبة الرجل على خطبة اخيه
يعنى ميروحش يعرف واحدة مخطوبة انه عايز يخطبها
او بيحبها
و اوعى تسيبى واحد انتى عرفتيه و اتخطبتى له و اهلك كمان وافقوا عليه
و انتى تضمنى لما تسيبى خطيبك اهلك هيوفقوا على اللى انتى مفكره
انك بتحبيه
و بقولك انتى تقدرى انك تظلمى انسان قدرك انتى و اهلك و دخل بيتكم من بابه
من غير ذنب ليه
و فكرى كويس و ربنا معاكى

ميادة ممكن اسالك سؤال
تعالى نقلب المشكلة كدا
وانتى بنت وبتحبى ولد واعترفتلة بعد ماخطب انك بتحبية
وهو قرر انة يسيب خطيبتة علشان خاطر يرجعلك
انتى هاتامنيلة بعد كدا يعنى بالرغم ان المفروض اول حاجة تفكرى فيها
انة زى ماساب خطيبتة النهاردة علشان خاطرك بكرة يسيبك علشان خاطر غيرك
يعنى مش هايكون فى ثقة رغم الحب والا انتى اية رايك سيبك بئى من ان هو بيحبك او انتى بتحبية
ماشاء الله احنا احسن ناس الوسوسة عندها مية مية
والتفكير واخد حدة على اكمل وجة
عمومايمكن اكتر حد هايفيد فالموضوع الشباب اللى موجود
يدخولوا ويقولوا رايهم
وعلى فكرة مش صعب ولا حاجة يعنى انها ماتخدش اللى بتحبة ولو كنت صعب اوى كدا
ماكنتش الحياة مشيت
ناس كتير بتحب وبتفضل سنين وسنين وفالاخر لاهيف الظروف الموضوع بيخلص وبردة بتتجوز عادى يعنى
عمرك سمعتى عن بنت او ولد ماخدش اللى بيحبة ووقفت بالنسبالة الحياة

وبعدين لو هو فعلا بيحبها دا مابنش من البداية لية لية ماقالهاش
لية استنى لما اتخطبت
لازم تفكر فكل دا
علشان كدا البنت عموما لازم تفكر صح فحياتها
مش بالقلب بس
العقل اكتر علشان تاخد قرار صح وماترجعش تندم علية بعد كدا
لو خطيبك نصيبك ارضى بية

اهلا بيك يا حدوتة معانا



ممممممم يعنى انا شايفة راى توتا تمام بصراحة ..يعنى انا شخصيا اعرف ناس كانوا بيحبوا وسابوا اللى بيحبوهم واتجوزوا وبجد سعداء جدا فى بيوتهم .. وطالما هى بتعز خطيبها وبتحترمه يبقى فى امل فى المستقبل انها تحبه ويبنوا بيتهم سوا .. يعنى بجد ملوش ذنب خطيبها فى كل دا ومش عشان هو دخل الباب من بيته يبقى دا يكون جزاؤه.. بس هى المشكلة انها رجعت بتقول انها لسة بتحبه.. طيب اصلا ازاى تتخطبى لحد وانتى بتفكرى فى حد تانى ..انا اسفة بجد بس انا شايفة دا نوع من انواع الخيانة انك تبقى تحت اسم حد وانتى بتفكرى فى حد تانى .. طيب كنتى هتعملى ايه لو مكنتيش عرفتى انه بيحبك .. كنتى برضه هتستمرى فى التفكير فيه وانتى متجوزة؟؟

ثانيا انتى قلتى انك متعرفيش اللى بتحبيه معرفة جامدة وممكن يكون عكس توقعاتك .. بعد الكلمتين دول متهيالى واضح جدا انه مش حب وكان مجرد اعجاب مبنى على اوهام صنعها خيالك بس لانك بتحبى حد انتى متعرفيهوش وعندك شك ولو واحد فى المية انه ممكن ميكونش زى ما تخيلتيه

والدليل انك قولتى ان سنين الجامعة كلها عدت يعنى كنتى بتحبيه مثلا فترة ثانوى او اولى كليه والفترة دى اغلبها بتبقى مراهقة ممكن الواحد يتحكم فى عواطفه او يسيبها تكبر وتكبر واوهامه تكبر معاها .. انا بقول الكلام دا بناء على اللى مكتوب بس طبعا احتمال كبير جدا يكون رايى دا مش سليم عشان انا بتكلم بناء على اساس كلام مكتوب مش احاسيس واقعية



اسفة على الاطالة ونسمع اراء باقى الناس



.....................

نورتينا يا حدوتة ونورتي القسم
وانا شايفة اخواتي بصراحة ادوكي اراء سليمة
انتي بتقولي انك بتحبية بس علي اي اساس اتبني الحب دة ؟؟ دة وهم الحب
احنا في حياتنا بنبقي محتاجين الاحساس دة ومحتاجين اننا نعيشة عشان يخفف عننا
ونخرج من مشاكلنا بس للاسف بنوهم نفسينا وبعد ما نكتشف ان دة مكنش حب من الاول
بنرجع لاول الحكاية من تاني ... اللي عايزة اوصلهولك ان دة مش حب وهو لو كان بيحبك
كان قالك .. وحتي لو زي ما انتي بتقولي كان مستني يتخرج مينفعش ييجي يصارحك وانتي مخطوبة
كدة هو مش بيحبك عشان اللي بيحب حد بيتمني يشوفة سعيد حتي لو مع حد غيرة وهو جاي يقولك انة كان بيحبك
بعد ما اتخطبتي يعني مستني منك انك تبيعي خطيبك علشانة ؟؟؟ دة مش حب
طالما خطيبك شخص محترم وراجل علي حق وبيعاملك بما يرضي الله وانتي مستريحالة وحسة انك فرحانة معاة
يبقي اوعي اوعي تسيبية عشان اللي بيروح مبيرجعش واحنا مش بنحس بقيمة الحاجة اللي في ايدنا الا لما بتضيع مننا
مش عايزاكي يا حبيبتي تمشي ورا وهم وتندمي ولو سيبتي خطيبة وهو كويس معاكي كدة يبقي انتي ظلمتية ...
فكري من تاني وصلي صلاة استخارة واعرفي دايما ان الحب أفعـــــــــــــال مش كلام
ربنا يرشدك للقرار السليم ووقت ما تاخدي قرار سليم باذن الله ياريت تطمنيني عليكي .... أختك : ديـــــــــنا

اقتباس :

عمومايمكن اكتر حد هايفيد فالموضوع الشباب اللى موجود
يدخولوا ويقولوا رايهم

وانتوا خليتوا حاجه نقولها

ما انتي ومياده وروز ودينا قولتوا كل حاجه وقلبتوا الحكايه من كل النواحي
بس هو فيه شبه اجماع علي انك تسيبك خطيبك يا حدوته غلط
وانا معاهم
اي حد لو واحده سابت خطيبها عشانه حتي لو بتحبه وبتموت فيه اكيد هيفكر الف مره ف انها ممكن تسيبه ف يوم م الايام عشان غيره.
وتقريبا زي ما اتقال دا كان مجرد حب مراهقه واوهام شباب
انت دلوقت ف وضع صعب لانك بتختاري شريك عمرك
محدش هيقدر يفيدك مننا ، مفيش غير اللي يعلم الغيب سبحانه وتعالي
صلي استخاره وادعي واطلبي منه يوفقك للخير
بس وانت بتتدعي اوعي تحطي ف دماغك اي حد من الاتنين (سواء خطيبك او حبيبك) فكري ان ربنا يرزقك بالخير وبس
وان شاء الله ربنا يوفقك ف اختيارك وتختاري اللي يسعدك .

يمكن انا جيت ع الموضوع متأخر علشان اطرح من فتره

بس انا رأيي انك بمجرد ما فكرتي وانتي مع خطيبك ف حد تاني وانك بتحبي حد تاني يبقي
مش من العدل لخطيبك انك تستمري معاه وانتي بتفكري ف حد غيره ما دام حطيتيه ف موضع مقارنه مع حد وانك ممكن تفضلي حد عليه يبقي انتي مش بتحبيه
علشان انتي لو كنتي حبتيه بجد حتي لو الشخص التاني ده كان جالك واعترفلك بحبه
عمرك ما كنتي هتفكري فيه وانك ممكن تسيبي خطيبك عشانه
فكري كويس وربنا معاكي