فضفضة ..........

ازيكم ياجماعة اخباركم اية
بصراحة انا مش عرفة اقول اية واول مرة احس انى عجزة عن الكلام
او حتى التعبير عن اللى جوايا
بس بجد عوزة اتكلم اوى يمكن القسم معمول علشان نحل مشاكل بعض
بس انا عوزة اخرج اللى جوايا يعنى عوزة افضفض بس
مش عوزة احل مشكلة عوزة اتكلم عوزة اخرج اللى جوايا
عوزة اتكلم من اول يوم دخلت فية المنتدى وكنت معاكم لحد النهاردة
انا دخلت المنتدى فالبداية خالص وكنت تعبانة جدا كنت لوحدى اوى وقفلة حياتى عليا وبس
ماليش دعوة باى حد من اللى حوالياوكان بقالى فترة على الحال دا اكتر من 3 سنين
وكنت مرة بتكلم مع حد وماكنتش طايقة حتى الكلام قالى طيب اية رايك تدخلى معانا المنتدى
قولتلة منتدى اية انا ماليش فالكلام دا كلة ولا بعرف حتى اسجل
قالى مالكيش دعوة انا هاسجلك
ودخل وفعلا فثوانى لقيتة عملى تسجيل فالمنتدى وقالى ادخلى وقولى اللى جواكى وحسة بية
وفعلا دخلت واول حاجة عملتها انى دخلت وقولت اللى تعبنى اللى استغربت منة فعلا
اقل من ثوانى لقيت ردود لناس حسيت بعد ماكنت حسة انى لوحدى اوى حسيت انى موجودة واتكلم ولقيت اللى سمعنى
رغم وجود كل اللى حواليا بس ارتحت اوى لما اتكلم ولقيت ردود من ناس معرفهاش كل اللى فرق معاهم انهم حسوا انى فعلا تعبانة محتاجة انى اتكلم محتاجة ان حد يرد عليا ودا فعلا حصل
من اول يوم دخلت فية المنتدى حسيت بحب الناس اللى موجودة لبعض ودا حبنى اوى فالمنتدى
حسيت انة بيت كل اللى فية عرفين بعض وبيسعدوا بعض ولما حد بيحتاج التانى بيلقية
انا بقول كدا عن تجربة ومش مرة احتاجت حد ولقيتة
انا بتكلم وبقول اللى جوايا واللى حسيتة واللى بحسة بجد معاكم

ودخلة النهاردة علشان اقول لكل حد عرفتة او ماعرفتهوش شكرا

تامر احساس حدوتة اخويا الصغير الطيب ربنا يكرمك ويوفقك ويحققلك كل اللى بتتمناة وبتحلم بية يارب

امانى حبيبة قلبى بجد ربنا يخليكى لمهدى وعمرى فحياتى ماهنسى قلقك عليا لما كنت تعبانة
بجد حسستنى يعنى اية صداقة يمكن مالقتهاش من ناس قريبة منى جدا انا ماليش صحاب قريبن منى
او كان ليا وكل حد بئى فحياتة بس لما تعبت نبرة القلق اللى كانت فصوتك حسستنى بجد بقيمة الحياة
وبقيمة الصداقة وبقيمة يعنى اية تعرفى ناس رغم بعد المسافت بنكم وبالرغم انكم ماشوفتوش بعض
بس ممكن تبقوا صحاب بجد واكتر من الاخوات بجد شكرا ياامانى على كل احساس حلو وصليهولى
وعلى كل انسان عرفتنى بية او كنتى همزة وصل لمعرفتى بحد فالمنتدى

ايدو ا اخويا الصغير بجد ربنا يخليك ليا بجد وانتا كمان لما تعبت كنت جامبى وفضلت تكلمنى لحد الصبح من قلقك عليا
وخوفك عليا لاتكون اخر مرة رغم انها فعلا كانت ممكن تكون اخر مرة بس عمر الشقى يالة لية نصيب فالحياة
ولا مليون كلمة شكرا ممكن توصف اللى جوايا ولا اللى انتا وصلتهولى انتا وامانى

شوقى شوقى احلى واطيب حد بجد عرفتة حد فقمة الاحترام رنا يوفقك لما بكون مديقة او زهئانة وبكلمة
بحس انة عاوز يعمل المستحيل علشان يخرجنى من اللى انا فية شوقى اخ بجد بمعنى كلمة اخوة مش مجرد كلام
وصديق بجد لما تحتاجة تلقية فاى وقت ربنا يكرمك يارب ويعدى جيشك على خير بتمنالك كل السعادة والخير والحب

علاء علاء بجد والله العظيم انا مالقيت انسان زيك فالاحترام والاخلاق والادب بجد ربنا يحميك ويحفظك ويحققلك كل اللى انتا بتتمناة يارب وتكون دكتور ناجح جدا وناجح فحياتك يارب

نور البنوتة الجميلة واول رد خلانى احب الناس كلها واحس ان لسة الحياة شغالة وجميلة

دينا اختى الصغيرة الامورة رغم انى اكبر منها احساسى بخوفها عليا جميل اوى
دينا بتخاف عليا اوى ولما بتحس انى فى مشكلة بتكون معايا لما بكون مديقة بنتكلم
وبنحل المشكلة ربنا يخليكى ليا ياقمراية

صاصا اخويا الصغنون الجميل بجد حد جميل اوى فكل حاجة فالتعامل فالتصرفات فكل حاجة
حاجة جميلة اوى اول ماتكلمها تحبها اوى تبقى مش عارف لية بس احساسك بيشدك لدا بهزراة وكلامة وطريقتة
ربنا يوفقك ياصاصا وتكون ناجح فحياتك

حسام حد طيب وجميل ربنا يوفقك ويسعدك ويكون اللى جاى فحياتك احسن من اللى فات

دادا طبعا حد فوق قمة الاحترام والاداب بجد ربنا يوفقك يامحمد وتكون انسان ناجح اوى فحياتك وناجح فشغلك
وتحقق كل اللى بتتمناة وبتحلم بياة

حمادة رغم انى مش عرفاك بس انتا بجد حد جميل ومحترم ربنا يوفقك

روز وبوسبس ونورى النوارة ربنا يوفقكم يارب وتحققوا كل اللى بتحلموا بية

مودى رغم انى ماتكلمتش معاك كتير بس بجد انتا انسان جميل اوى
وان شاء الله تكون دكتور ناجح وتحقق كل اللى بتتمناة وبتحلم بية


لمبادا حد جميل باخلاقة وكلامة بجد بتمنالك التوفيق والسعادة والحب من كل اللى حواليك

ريرى ريهام بجد مش عرفة اقولك اية والا اية ولا اقولك شكرا على اية على انك بتسمعنى
او على انك لما بتلقينى بعيط بتقعدى تقولى علشان خاطرى اهدا وماتعيطش بجد بحس انك اختى بجد
مش مجرد صديقة بالعكس ربنا يحميل ويحققلك كل اللى بتتمنية ويوفقك ويسعدك ويحبب فيك الناس اكتر واكتر


احمد مصطفى مليون كلمة شكرا بجد ماتكفيش احمد بجد نعم الاخ والصديق دا اللى بجد يتقال علية
الصديق وقت الضيق انا احتاجت احمد بجد ولقيتة موجود وكان بدل الاتصال علشان يطمن عليا وعلى المشكلة اللى كانت حاصلة كان مليون بجد مش لقية كلام اقولة فحقك ربنا يوفقك


ام يوسف معلش هاكبرك شوية ويمكن كتير رغم انى ماتكلمتش معاك اوى بس بحس انك زى ماما
ربنا يخليك لولادك يارب ويحميهملك ويحميكى ليهم

فارس اول مادخلت المنتدى كنت بتابع ردودك ويمكن كنت اكتر حد يمكن علشان حاطط صورة تامر
كنت بحس انك شبهة بس بعد كدا لما اتعملت معاك لقيت انك احسن مليون مرة من تامر وغيرة بجد انسان جميل
ومحترم ولما تحس انى فى حاجة حتى لو من الكلام بس بتقول فية اية مالك ربنا يوفقك يافارس وتحقق كل احلامك


كل حد فالمنتدى عرفتة او معرفتوش بجد بشكرة انة حسسنى انى موجودة فبيتى مع اخواتى واصحابى

يمكن ناس كتير تقول واحنا مالنا بكل الكلام دا هى فاضية ومش لقية حاجة تعملها
لا والله مش فاضية ولا حاجة بس بجد كنت محتاجة اتكلم
علشان وسط كل الناس الجميلة دا
يكون فى حد وحش
حد قرفنى وزهئنى بجد مش هاقولة اكتر من حسبى الله ونعم الوكيل
مفيش حاجة بتروح وكما تدين تدان ولو بعد حين ربنا مش بيضيع حق حد

انا دخلت المنتدى وانا كنت تعبانة جدا
ودلوقتى رجعت لنفس النقطة اللى ابتديت منها
دخلت تعبانة ودلوقتى بردة تعبانة
يعنى نقطة ومن اول السطر

ya alby

أهلا يا مجهول خرج لجواك وفضفض إحنا معك نسمعك

أنا لما قريت موضوعك مكنتش في البيت .كنت على جهازمش عربي

فرديت بدموع بس

أنا عايزة أقلك إحنا كلنا إخواتك وحدوتة مش زي أي منتدى دا بيت العيلة بجد عشان كدا بحبه أنا

لأنه بيجمعني بناس بحبها حب حقيقي

أنا مشتركة في أكبر منتدى في الوطن العربي لهو الدي في دي والكل عارفو أكيد ولي أصدقاء كثير

هناك وبحبوني أوي أوي والكل بيعرفني

ولما مش أدخل فترة لما أدخل بلاقي 13رسايل زوار عالبروفيل بتاعي

الكل بيسأل علية بيبهروني صراحة بحبهم أناكمان بحبهم

لكن صدقوني أقسم بالله لمابدخل حدوتة بحس بالأمان بحس أني دخلت بيت بجدفيه عيلتي لبحبهم

أول حاجة أعملها بشوف أي حد من الأعضاء أخر مرة دخل عشان أطمن عليهم لو حد بقالو يومن مدخلش بقلق بجد

بحب كل أعضاء حدوتة وبخاف عليهم كأنهم إخواتي

أنا مرات كتيرة فكرت أسيب حدوتة صدقوني ،مثلا إنت لودخلت بيتكم ولقيت أخوك مش بكلمك

وزعلان منك ومش بيعطيك إهتمام مش هتحب ترجع البيت تاني

فكرت كتير أسيب حدوتة لكن مقدرتش بشتاق لإخواتي بحبهم من غيرهم بحس أني يتيمة مليش حد

أخوية الصغير لما بشوفني بيتريق علية بناديني بسفن دوتة هو مش عارف7تعني ح

كل مرة بلاقيني فاتحة حدوتة

حدوتة أدمنت عليه وعلى حب أعضائه صراحة عرفني بناس حلوة مش هدكر الأسماء

بجد بجد بجد منتدى حلو وجميل

سوري طولت عليكم لكن لسة جواية حاجات كتيرة عايزة أقلها لكم

بقول لمجهول إحنا معك لزعلك هنموتوه مش هنطردوه بس

تحياتي

يااااااااااااااااه يجد جميل اوى احساسك دا
بس انا زعلت فى الاخر يعنى كنت فاكرة الموضوع هيستمر حلو وكدا اتارى فى حد مزعلك
بس زى ما قال علاء الانسان اللى مش كويس ملوش مكان بيننا واكيد هيبان على حقيقته قدامنا كلنا وساعتها ان شاء الله ترتاحى ويبعد عن المنتدى كله طالما هو ميليقش بيه وباعضاؤه المحترمين
بجد بشكرك جدا على احساسك الراقى دا واتمنى انك تنسى اى زعل وربنا يوفقك

انا بشكرك على كلامك الحلو على كل اعضاء حدوته

ثانيا

مينفعش اننا نهرب من المشاكل

عشان حد مش يستاهل اننا نزعل منه

ياريت مش تسيبنا يا حدوته

وعلى اد مانتا بتحبنا

كل حدوته بتحبك اوى

ياريت ترجع لينا

او عالاقل خلينا نسمع اكتر واكتر

وبجد بجد

احنا كمان بحبك اوى اوى

انا بجد مش عارف اقولك اية
بس انا عرفتك ان انا هساعدك فى مشكلتك دى وزى ماقال علاء
هياخد بالة من المنتدى اكتر واكتر
عشان يعرف مين الحلو ومين الوحش
وطبعا الموضوع دة انا بالذات مش هسكت علية
وبأذن الله حقك هيرجعلك ياحدوتة
لان الشخصية دى شخصية زبالة
وطبعا انا لو مكانك مفكرش فى الشخصية دى اساسا
أو مبعدش عن الناس اللى انا حبتهم وافضل فى المنتدى معاهم
بس طالما انتى قررتى تعملى كدة يبقى براحتك
وربنا يوفقك يارب فى حياتك كلها
وهنفضل بنحبك كلنا
SaSa

ربنا يخليكي ليا يا حبيبة قلبي وانا بحبك اوووووووووووووووووووي
وربي يعلم وشاهد عليا وانا صايمة كدة اني بحبك في الله بجد
ومش عايزاكي تزعلي ابدااا وفوضي امرك لربنا مفيش احسن منة
وخلي قلبك ابيض وميشيلش حاجة لحد ويسامح الناس اللي حوالية
مهما حصل اوعي قلبك تيجي علية نقطة سودة لان ساعتها النقطة دي هتكبر
وهتبتدي تكرهي ... واعرفي دايما ان مفيش حد مش بيخطأ وساعات لما بيخطأ
بنبقي احنا اللي ادينالة الفرصة دي ... خلي قلبك ابيض والابتسامة متفارقكيش
انا لما حد بيظلمني بدعي ان ربنا يسامحة ويبعدة عني ... صدقيني يا حبيبتي
الحياة مليانة باكتر من كدة متخليش حاجة صغيرة تكسرك او تهزك واعرفي ان ربنا رحيم
عمرة ما بيشيل حد هموم فوق طاقتة وبصي للناس اللي حواليكي هتلاقيهم شايلين اكتر منك بكتيير
ساعتها هتبصي لنفسك وتعرفي ان اللي انتي فية ميجيش حاجة جنب اللي الناس فية واقعدي مع نفسك شوية
شوفي انتي غلطي ف اية واية اللي خلا كل دة يحصلك ؟؟ فكري مع نفسك وافتكري ربنا دايما
وخلي قلبك ابيض ودايما دايما يسامح وميحبش الاذية لحد فكري يا اجمل اخت ف الدنيا
أختك :: ديـــــــــــنا

وبالنسبة لاخواتي وحبايبي الباقيين اللي ردوا واللي هيردوا بلاش نغلط ف حد
ولا نهينة احنا بني ادمين يعني بنغلط .. ولو اي حد غلط فينا ولا عمل معانا موقف وحش
ندعيلة ربنا يهدية ونخلي قلبنا دايما نضيف وميشيلش لحد حاجة ممممممممممم انا مش خطيب جامع
ولا ملاك بس انا بحاول انفذ اللي بقولة وانتوا كمان باذن الله لازم تحاولوا تنفذوة مش عايزاكم تزعلوا مني
ولا من كلامي بس فكروا فية قبل ما تحكموا علية .......... أختكم :: ديـــــــــنا

انا مش عارف ليه لما كنت
بقرا الشكر حاسس ان فيه نبرة حزن

انا هاقولك على حاجة واحدة

دا اصدق موضوع قريته فى المنتدى بجد
وبجد انا مش عارف اقولك ايه

انا ماعرفش ايه اللى حصل بالظبط
بس زى ماقالت دينا اقعدى مع نفسك وشوفى ايه اللى حصل
واصبر واحتسبى

اولا كده اسمحولي اقوول من تاني سلاموا عليكوا

7dota said

اقتباس :

حد قرفنى وزهئنى بجد مش هاقولة اكتر من حسبى الله ونعم الوكيل
مفيش حاجة بتروح وكما تدين تدان ولو بعد حين ربنا مش بيضيع حق حد

انا دخلت المنتدى وانا كنت تعبانة جدا
ودلوقتى رجعت لنفس النقطة اللى ابتديت منها
دخلت تعبانة ودلوقتى بردة تعبانة
يعنى نقطة ومن اول السطر

اولا حدوته المجهوووول مقالش خالص انه هيسيب المنتدي مش عارف انتوا جبتوا الكلام دة منين ... ودة اساسا توبك فضفضه مش توبك اعتذار خالص

كمان مينفعشي حد بيحب منتدي حدوته واعضاء حدوته بتحبه يفكر يسيب المنتدي لمجرد انه حد تافه غير معلووم نكره ف المنتدي مهما كان .. طلع حد مش كويس بموقف او غيره .

ثانيا حدوته بيقوول ان الشخص ده قرفه وزهقه وواضح انه عمل موقف مش تماما وطلع غير لائق وغير مشرف للمنتدي . بس خارج المنتدي مش جوة المنتدي
لاني عمري ما هسمح ب حد يغلط ف حد جوه المنتدي اساسا وانا مش لوحدي
ما شاء الله في ادمن وباقي الاداره ومشرفين واعضاء زي الفل عمرها ما بتسكت علي غلط وهما دوول اعضاء حدوته .

اخيرا ووعد مني يا حدوته لو الشخصيه الزباله دي ظهرت بشكل غير لائق والله هيتعرف وانا مش هسمح بوجودها هنا .

شكرا لكلامك الحلو ياحدوتة

بس عايزاك اقولك حاجة مهمة جدااااااااااااا

لوعايز تحل مشكلتلك بجد اعمل الحاجات دى

1-حدد انك تنهى المشكلة دى وتقتلعها من جذورها

2- ادعى ربنا يوفقك فالموضوع دة

3-نفذ الى ربنا قال علية (وإستعينوا بالصبر والصلاة وإنها لكبيرة إلا ع الخاشعيــــــــن)

صدق الله العظيم

وربنا يوفقك

شكرا يا حدوتة على و صفك لى بانى ماما
يشرفنى انى ابقى ام معنوية ليكى و لباقى اعضاء
حدوتة و كاى ام دايما بتتمنى ان اولادها يكونو اقوياء مش ضعفاء
اى مشكلة تقابلهم تكسرهم و تخليهم يتقوقعو على نفسهم
و يدخلو بيات شتوى
لالالالالالالالالالالالالالالالالالالالالالا
انا برفض كده لازم تبقى قوية واجهى اللى زعلك
خدى حقك منه اوعى تنسحبى و تقعدى تعيطى
و لو فيى حد وحش شوفى انتى قولتى على اد ايه انهم كويسين و بيحبوكى
و مش بيقدرو يسيبوكى زعلانة مش اصلا يزعلوكى
عرفينا مين زعلك و احنا نساعدك تاخدى حقك
و نحاول نقومه الأول و يعرف انه غلط فى حقك و يعتذر مش ليكى لوحدك
لالالالالالالالالالالالالالا
لحدوتة
و شكرا و مش عايزاكى ضعيفة انا عارفة انك قوية
بنفسك و بينا احنا كمان

مش هيحصل اللي بيتقال ده
لازم تكوني اقوى ومش تخلي اي حد ينجح في انه يزعلك
ولا ايه ؟؟؟


و ان شاء الله هتكوني زي الفل
فارس