24 شارع الحجاز ( لهشام الجخ ) + القصيدة بصوته

24 شارع الحجاز ... القصيدة بصوت هشام الجخ في اخر المضوع


إتدلّعي .. واتبغدَدِي .. واتفاخري .. واتباهي
قولي لكل الناس ..ده عشقني والله ..
لِـمِّي العيال حواليا زِفُّـوني ..
ظاظوا عليّا وحَدِّفُوني طوب ..
ما انا اللي سِبْت عنيكي لَفُّوني ..
وانا اللي استاهل كل يوم مركوب ..

فاتدلعي .. واتبغددي .. واتفاخري .. واتباهي ..
آدي ضَحِيَّة كمان فِدا رِمشك الساهي ..
موت الضحايا جَزَايَـا .. ما انا اللي وَدِّيـتِـك ..
ولْـحَدْ حَدْ ما وَدِّتُـوش ولا حَدْ وَدِّيـتـك ..
وقَلَعْت كل سنيني على خَصْرِك ..
ضَفَّرْت شَعْرِك عِشّ جُوَّايا ..
بايَـعْت حُكمِك وابتَدِيت عَصْرِك ..
ووقَفْت ورا عرشِك ومَسَكْت هـوَّاية ..

موت الضحايا جَزَايَـا وكُلَّها ضحايا ..
مين اللي قال الحب آخره عَمَار ؟؟؟
الحب آخره نهاية في رحَاية ..

القسوة طاحنة والحجر دوَّار ..

فاتدلعي .. واتبغددي .. واتفاخري .. واتباهي ..
واستنكري من عزتي .. واستهتري بـجاهي ..
خَلِّيني مضرب مَثَل من بعد هيبة و وزن ..
كُبَّي المرار في العسل .. واملي الفرح بالحزن ..
يعني انتي أولهم ؟؟؟ ولا انتي اول همّ ؟؟؟
ولا انتي اول سهم إتْسَنْ لي واتسمّ ؟
لو تكشفي ضهري تلقي السهام علامات ..
وانا زي زرع ف هوا وَطَّى حِيِـي وعَلا مات ..
موت العلالي شرف .. بس اسمها موتة ..
مش عدل تبقي ف ترف وانا باطفح الكوتة ..
ما يا إمَّا نَقْسَمْهُم وَخْزَة قُصَاد وخزة ..
يا إمَّا لا مواخذة .. توتة يا حدوتة ..

وابقِي اكدبي براحتِك .. واتدلعي براحتِك ..
طعم الهزيمة جِزَا للي يزور ساحتِك ..
وانا قلبي يا ما غلب .. مش عيب يبات مغلوب ..
اهو برضه فِدْتينا وكَفَّـرنا بيكي ذنوب ..
ولَـحَسْـنا من شَهْدِك وشرِبْـنا من رِيقِك ..
وسْكِرْنا من كاسِك وكَسَرْنا إبريقِك ..
وطْعِمْنَا من حُسْنِك وشْبِعنا بِـبَـريقِك ..
ومْشِينا في طَريقِك ..
ورجِعْنا مَـلْـوِ اليَدّ ..
جَرْحِي قُصَاد جَرْحِك .. ولا حد ظالم حد ..
ولا انتي فاكرانا رجالة خيبانة ؟
نبكي على النسوان ونْسِحّ في بكانا ؟
كنتي اسألي "نانا"
اللي اسمها "نانا"
يا دوب زِعِلْنا يومين واهي دنيا لاهْيَانا

ما تكدبيش ع الناس .. الناس دي عارفاني
قلبي خشب لو غطس بِيْقِب من تاني
فماتحرجيش روحِك وتقولي ده عشقني
بدال ما صاحباتك يقولك آدي دقني
حِبِّي على قَدِّك واحكي على قدك
وان جت سيرتنا ف يوم ابقي الزَمِي حَدِّك
تتدلعي ماشي .. تتبغددي ماشي
وتقولي حبني موت برضه ما يـجراشي
بس انتي من جوا فاهمة ان زمنك مات
وبقيتي زي اميرة قلبها شحات

لِفِّي على صحابي .. سِبِّـيني في غيابي
قولي ان عمرك يوم ما وقفتي على بابي
لا كَوِيتي قِمْصاني ولا جِيتِـي زُرْتِيني
وللا تعرفي مكاني ولا تعرفي تـجيني

واني يا دوب واحد دايب ف دباديبك
عامل كما عَيِّل شابط في جلاليبك
وانتي يا عيني أُف
زهقانة مني خلاص
عملتي زار بالدُّف
وسُقْتِي كُلّ الناس
وانا برضه لازِقْلِك
معلش حَظِّك كدة رَبِّك ورازِقْلِـك

روحي يا شاطرة هناك انضمي للالبوم
انا كل عشرتي بيكي 22 يوم
عملتي نفسك حكاية ؟؟
ومحبة فيَّـاضة ومَخَدَّة بَكِّاية ؟
وسهر وسُهْد وويل ؟
وبكا و غنا و مواويل ؟
في 22 ليل !!
على اي حال
شكرا وشكرا ثم شكرا للقصيدة
قَلَّما تأتيني امرأةٌ بأفكارٍ جديدة
لقد بنيت لحبنا قصراجميلا رائعا
وظللت فية بجانبي ومسحتي اقدامي سعيدة
وخشيت ان يتسلل الحساد من جنباتة
فبنيت اسوار من الصلب المسلح حولة
واختارت منطقة بعيدة
اليوم اخرج تاركا اياك خلف السور في ياس وحيدة
فلطالما احببتي هذا السور قبل فراقنا
اليوم ترتعدين خوفا تضربين الارض كالطفل الصغير
تحاولين لتنفزي وتكسري وهم حديدة
ونسيت اني شاعر فن النساء هوة الوحيد من الفنون عشقتة
وحلفت اما هالكا من دونة او ان أجيدة




القصيدة بصوت هشام الجخ

لا لا لا بجد جااامدة اووووى

تسلم يا علاء على النقلات الجميلة دى

بجد الواد دا جامد اوووووى

تسلم يابرنس

لا يا سمسم هشام دة مشهور اوي اساسا عندنا في عين شمس ....

بس بصراحة جااااااااامد

تسلم ايدك يادكتور علاء شكرا ليك الكلمات جميله

حقيقى جدا لاكن للاسف برده الوصله لاتعمل اتمنى

اعادة ا لرفع

هههههههههههههه

والله كويس ان في ناس بتفتكر التوبكات القديمة

تم تجديد الرابط يا ملك دة كفاية انك نورتي التوبك

وان شاء الله تعجبك القصيدة اكتر اما تسمعيها .. سلام

امممممممم طب حاول تشوف الرابط معلش تانى كده انت
عامله على الفورد شير ده كويس بس مش بيفتح خالص
بيقلب انجليزى مش عارفه ديه مشكله عندى ولا فين ؟ معلش
بتعبك معايا لاكن انا بحب القسم ده لاكن لى فتره مش
بدخل عشان تعب ملكة الاحزان

انا جربت يا ملك الرابط حالا بنفسي وشغال مية مية والله


واضح ان فية مشكلة بينك وبين الفور شير بقي :D:D

عموما يا جمييل ولا يهمك اختاري انتي اي سرفر ارفعلك علية التلت قصايد

وانا مستني ردك ان شاء الله

نورتي التوبك .... سلام